Dingdi
Synod moderator-in Sikulpui a hawng

Mizoram sorkarin Mizoram Synod kuta a hlan tak Aizawla Sikulpui chu vawiin khan Synod moderator Rev. R. Lalchangliana'n a hawng.

Zosap missionary Zosaphluia'n kum 1898-a a din, kum 1905-a sikul building sak ‘Sikulsen’leh kum 1914-a sak ‘Sikulpui’ building leh a ramte, sikul bungrua zawng zawngte chu Mizoram sorkarin kum 1952-ah kohhran kut atanga lain, a kum 67-na nikum May ni 29, 2019 khan Mizoram

Synod kutah bawk a hlanlet leh a ni.

Sikulsen (Boys' primary school) leh Sikulpui (Boys' middle school) kaikawpa 'Sikulpui' tia vuah, Mizoram sorkarin Mizoram Synod kuta a hlanlet leh takah hian teaching staff 13 leh non-teaching staff 3 an vaiin thawktu 16 an awm.

Sikulpui hawnna inkhawm hi Mizoram sorkar atangin education minister Lalchhandama Ralte; commissioner & secretary, school education Esther Lal Ruatkimi leh school education director James Lalrinchhana te pawhin an telpui a. Education minister chuan zirtirtute chu zirlaibu chhung ami hriatna mai ni lo, naupangte theihna tak tak phawrhchhuahsak tura an theihna hmang tur leh sorkar hnathawk tur lehkhathiam ringawt ni lo, private sector lam thlenga chhawr tlak mithiam chher chhuak turin a fuih. 

Dingdi
Kohhran