Harhna
Khawzawl District-a Quarantine Centre-ah mi 14 leh Isolation Centre-ah mi 2 awm mek

 Harhna,ni 2nd,July 2020: Mizoram-in Covid-19 hrileng avanga March ni 22, 2020-a complete lockdown a puan atanga partial lockdown (unlock 1.0­) kan chuan kai tan tirh thleng hian Khawzawl DLTF on Covid-19 bakah Khaw hrang hrang 28 - a khua/veng 36-ah VLTF on Covid 19 din a ni a. Mipuiin hri an kaidarh lohna tur leh nitin khawsakna-a harsatna lian lutuk an tawh lohna atan theihtawpa hma la nghalin mipui mamawh zualpui te chu VLTF hmalakna in home delivery tihsak thin an ni. VLTF ten hmun remchang laiah duty point siamin chhun zan zawmin an duty thin bawk.

Khawzawl District chhunga khaw 28 te chu Zone 9-a thendarh in DLTF memberte Zonal Officer cum Magistrate atan ruat an ni a. Zonal officer-te hian an bial theuhva mipui ei leh bar dinhmun leh dan leh thupek kenkawh dan te an thlithlai reng thin.

Hrileng avanga tangkhang lo hawte khung hranna tur Quarantine Centre pawh mi 530 dawl zo tur lo buatsaih a ni a, heng centre-ah te hian mawh phurtu bik Zonal Officer, Care taker leh Nodal Officer for Care takers bakah Police duty dah vek an ni. An ni hian an bial chhunga cetre-a dah turte chu an lo thlen hlima lo dawnsawn atanga an chhuak tur thlah liam thlengin mawh an phur a ni. Khawzawl District atan hian Quarantine Centre 26 leh Isolation Centre 6 lo ruahman lawk a ni a, heng zinga Quarantine Centre 18 leh Isolation Centre 1 te hi hman an ni a, a dang zawng chu hman an ni ta lo.Ram pawn atanga tangkhang lo haw te hi Zuchhip field-a Screening point-ah lo dawnsawn thin an ni a, DC, SP, Medical Team, Zonal Officer leh Care taker te bakah thawktu dang ten an lo dawngsawng thin.

Hrileng in ei leh bar dinhmun a tih derthawn theih avangin ei leh bar tam zawk tharchhuah anih theihna atan DLTF hma lakna in Kangbur, Bawnzawl leh Tiau Zaute en ho a ni a, project proposal pawh siam nghal a ni bawk. Hemi zulzui hian Agriculture Development Board Vice-Chairman Pu H Biakzauva MLA chuan May ni 13, 2020 khan Khawzawl a tlawh bawk.

Bialtu MLA leh Deputy Chief Minister ni bawk Pu Tawnluia'n hrileng dona atan Khawzawl District tan sum fai leh hmanrua tam tak a rawn thawh thin a. H&FW Minister Dr R. Lalthangliana pawhin June ni 5 khan Khawzawl tlawhin hrileng dona tur hmanrua thahnem tak a pe bawk. Hei bakah hian Mimal, Pawlho leh Khua thahnem ngai engemaw zat in thilpek - pawisa, chawhmeh leh hmanrua chihrang hrang tan tak an pe a, hei hian hrileng dona kawnga sawrkar sum sen tur tamtak a phuhru ani.

Nimin thleng khanKhawzawl District-a Quarantine Centre leh Isolation Centre-a dahluh tawh zawng zawng hi mi 293 an ni a, nimin mi 1 chhuak telin an zinga mi 277 te dam takin an chhuak tawh a, Quarantine Centre-ah mi mi 14 leh Isolation Centre-ah mi 2, an vaiin mi 16 an la awm mek thung. Covid-19 hri kai mi 3 hmuhchhuah tawh ni in mi 1 chuan dam takin Isolation Centre a chhuahsan tawh a, midang 2 te pawhin harsatna an nei lova, an dam thuai beisei a ni.Quarantine Centre leh Isolation Centre-a awm mek mi 8 te swab sample lak sak an ni bawk. Swab sample laksakte hi an rawn hawna la rei loh avanga la test sak loh mi 6 leh positive enkawl lai mi 2 te an ni. 

Harhna
COVID 19