Harhna
Dr R.Lalthangliana’n Govt. Hrangbana College zirlai kai thar te lawmna hun a hmanpui

 Harhna,ni 10th,OCtober,2020: Nimin khan Govt. Hrangbana College chuan zirlai kai thar te lawmna leh magazine tlangzarhna hun an college Golden Hall-ah an hmang a. Higher and Technical Education Minister Dr R.Lalthangliana chu khuallian niin Director Pi K.Lalrinzuali chu khual zahawm a ni.

Dr R.Lalthangliana chuan Mizoram sawrkar hnuaia college lian ber, international player tam tak kawl mek tu, mi hlawhtling tam tak chher chhuak tawh tu leh chherchhuak mektu Hrangbana College chhuanawm a tih thu a sawi a. He college tha tak din nana sulsutu zawng zawng te leh thawk mekte inpekna fakawm a tih thu, Freshers Social Programme-ah hian a sawi. Zirlaite fuihin H&TE Minister chuan eng dinhmunah pawh ding se, theihtawp chhuaha tang te tan chuan hlawhtlinna kawng a inhawng, a ti a. Tih tak takna, tumruhna leh taimakna chu khawvel kan hneh theihna tura thil pawimawh a ni, a ti. Tun kum zabi kan hman chhoh mekah chona leh inelna a nasat em em rualin tih tur leh duh thlan tur (opportunity) a tam em em a, he remchanna kan hmaa awm reng hmang tangkaitu ni thei turin chhawrtlak thiamna neih a pawimawh Dr R.Lalthangliana chuan a ti a. Kan ram chakna innghahna chu thiamna a ni a, zirlai te hi kan ram rohlu ropui ber in ni, a ti.

H&TE Director Pi K.Lalrinzuali pawhin zirlaite chu ngaihtuahna hmang thiam, mi puitling ni turin thahnemngai taka lehkha zir turin a fuih a. Zirlaiten thiamna bakah nun mawi, aia upa te, zirtirtute leh ram hruaitute zahthiam an zir tel pawimawh a tih thu a sawi.

Government Hrangbana College hi July, 1980 ah din niin 1985 ah deficit ah hlankai a ni a. Kum 1995 ah permanent affiliation neiin kum 2003 ah provincialised a ni. NAAC B++ accredited niin a din tirh atangin he college atang hian BA zirchhuak 8001 leh B.Com zirchhuak 1774 an awm tawh a, zirlai 9775 zet he college atanga graduate chhuak an awm tawh a ni. Tun dinhmunah zirlai 1955 an nei a, kuminah hian zirlai kai thar (1st semester) 810 an nei a ni.

COVID-19 hripui leng avangin programme-ah hian zirlai nawlpui an kal lova. Mahni in lam atanga an lo chhim theih nan LPS Cable TV leh Youtube channel kaltlangin live a pek chhuah a ni.

Harhna
Education