Harhna
MYC Chairman-in Lungleiah Coaching Centre thar hawng

Harhna,ni 10th,September,2020: Mizoram Youth Commission Chairman Dr Vanlaltanpuia chuan MYC Coaching Centre thar, Baichi Building, Chanmari Lungleiah a hawng. MYC Coaching Centre thar ah hian MYC hnuaia coaching program hrang hrang kal mek bakah Program thar pathum – Offline IAS Coaching, State Combined Civil Service Coaching leh MPSC hna lak bak zawng la tu tur MSSSB Coaching te a awm a ni.

Mizoram Youth Commission Chairman Dr Vanlaltanpuia chuan Lunglei MYC Coaching Centre thar, hmun zau tha tak leh khawpui hmun laili taka buatsaih ani chu lawmawm a tih thu sawiin chhimlam District mipuiten tangkai taka an hman a, kawng hrang hranga hmasawnna thlen tu anih ngei a beisei thu a sawi a. Mizo thalaite hmasawnna turin MYC chuan theihtawp a chhuah zel dawn a ni tiin Siaha leh Kolasib District -ah te MYC Coaching Centre buatsaih tura ruahmanna a kal mek thu leh Aizawl ah MYC Youth Centre sak mek niin, Lunglei leh Serchhip ah te MYC Youth Centre sa tura ruahmanna a kal mek thu a sawi bawk. Mizo te zingah Central Service, a bik takin IAS tling kum tam tak kan awm tawhlo chu pawi a tih thu sawiin India rama office pawimawh tak takte luah ve thei turin Mizo mipuite thapui thawha kan tan tlan a tul takzet a ni, a ti a. Thalaite tana fuihna thu sawiin MYC Chairman chuan an zirlai mai piah lamah an hawiher ti zau a, tawng chungchangah pawh thiam taka English leh Hindi hmang thei tura inzir tur leh, zirna leh hna zawnna leh eizawnna kawng hrang hrangah pawh hnam dangte el phak tum turin a chah a ni.

Coaching Centre thar hawnna ah hian Lunglei HPC Vice Chairman Pu Lawmawma Tochhawng, MYC member-te leh Secretary Pu Donny Lalruatsanga leh MYC-a thawktute, Lunglei SP Pu Stephen Lalrinawma leh District official dangte leh Sub Hqrs YMA hruaitute leh sawm bik dangte an tel a ni. Mizoram Youth Commission Coaching Centre thar hi Baichi Building, chamanri Lunglei, opposite District Park ah a awm a. Vawiin program ah hian MYC Secretary Pu Donny Lalruatsanga in Welcome Speech sawiin Pu Lalmuanzuala, MYC Lunglei –in lawmthu sawina hun a hmang a ni. MYC Chairman hian Theiriat hmuna MYC Youth Centre sakna tur lungphum a phum nghal a ni. 

Harhna
Education