Harhna
School Education Minister in Sikulpui hawnna hmanpui

Harhna,ni 17th October 2020: Nimin chawhnu khan School Education Minister Pu Lalchhandama Ralte chuan Sawrkarin Mizoram Synod hnena a hlan tak Sikulpui hawnna inkhawm a hmanpui a. He hun, Sikulpui Hall, Mission Venga buatsaihah hian Sikulpui hi Rev.R.Lalchangliana, Moderator, Mizoram Synod chuan a hawng a ni.

School Education Minister Pu Lalchhandama Ralte chuan Sikulpui a taka kalpui tura hawn a lo ni ta chu lawmawm a tih thu a sawi a. He hunah hian Zirtirtute chuTextbook knowledge ringawt ni lo, naupangte theihna phawrhchhuahsak tura zirtirtuten an theihna hmang tur leh sawrkar hnathawk tur lehkhathiam ringawt ni lo, private sector lam thlenga chhawr tlak mi thiam chher chhuak turin a fuih a. Sawrkar, kohhran leh khawtlang te tangrualin Sikulpui chu ram siamthatna hmun pawimawh tak a nih theih nan duhsakna a hlan a ni.

Sikulsen(Boys' Primary School) leh Sikulpui(Boys' Middle School)kaihkawpa Sikulpui tia vuah tak hi kum 1952 atanga kum 2019 thleng(Kum 67 chhung)Mizoram sawrkarin a enkawl hnuah Mizoram Synod kutah Ni 29, May 2019 khan a hlan let leh a ni. Sikulpui hawn takah hian Teaching Staff 13 leh Non-Teaching Staff 3 an vaiin thawktu 16 an awm a ni.

Sikulpui hawnna inkhawm hi Pi Esther Lal Ruatkimi, Commissioner & Secretary, School Education Department leh Pu James Lalrinchhana, Director, School Education Department te pawhin an telpui a. Mizoram Synod hruaitute, Synod Education Board hruaitute, Intach Mizoram Chapter hruaitute, Sikulpui-a thawktute, Mission Veng Local Council leh YMA hruaitute an tel bawk a ni.  

Harhna
Education