Lelte Weekly
Zun Kawng Hnai La - Dr.Thangchungnunga, M.S.Ortho

Hman deuh kha chuan, zun kawng a hnai la tih hi a tam em em mai a. Kan changkang viau tawh in kan nun pawh a lang mawi viau tawh. Mahse, tunah pawh khawsik leh zun kawng a hnai la, tih vel hriat tur hi a la tam em em tho mai hi kan in en chian a, kan fimkhur deuh chu a ngai dawn a ni.

A eng a pawh chu nise, zun kawng kan tih mai, kal (kidney) aṭanga kan serh hmawr thleng hian thil chhe paihna, tui chhe luan kawr, pipe pawh ti ila a in ang reng tho awm e. Kan taksa in kan chaw ei leh in, engkim kan mamawh a lak kim vek hnuah, a kuang bang, taksa tan a hmanna awm tawh lo a awm ve ṭeuh a. Chi hnih in a in ṭhen phawk ti ila a rem ber ang. Ek lam a kal chi, a hrawmhraw deuh, ril lamah kal in êk chhuah tur a ni a. Pakhat leh chu, a tuiril lam chi, taksa mamawh tawh loh, kal (kidney) in a lo thlifim ve thung a. Kal ah hian chhihri, sin tak a awm a, Glomerular filtration kan ti mai a. Hei hian a lo hri sin leh zual a, hemi kal tlang chin ngat hi chu, kan taksa in a mamawh tawh loh an ni.

He chhihri hian paih chhuah tur tam tak, paih chhuah theih loh te pawh a nei ve tho a, a chhan tam tak a awm thei. A hmasa berah chuan, kan tuihawk luankawr hi tih fai reng tur a ni a. Hei hian thingpui sen hang leh tui thianghlim in tam a ngai, tih chu i hre thei nghal mai awm e. Tui luankawrah tui a luan reng loh chuan, chil, kuhva chhak, vaihlo bung leh lei nawi a awm ṭeuh dawn a. Tui ṭin khat in va leih vak la, a fai vek ang a, darkar hnih hnuah va en leh la, a balh ngai tho in a lo bal leh ang. Zing a tui litre khat in vak a, chhuna in leh a, tlaia litre khat in leh vak ang hi kan duh lova. Mi pangngaiin ni khatah litre li vel tal, kan taksa hnathawh nan a mamawh a ni, litre khat hi chu zing chhun zan a kan chaw ei ah hian tel tura ngaih a ni.

Ka zung peih lo tih vanga tui in tam peih lo ho hian, zun kawng natna an vei awlsam em em. Tui in dan tur ṭha chu, nilengin tui luankawr a luang reng turin, darkar tinin, YMA no kan tih mai ang no thum tal in reng a ngai a. I theih loh pawhin no hnih tal in ngei ngei ang che, i zun hi a fim kar nileng tur a ni. Duhthusam phei chuan hing lo khawp a i in theih chuan zun kawng hnai la i nei ngai lo ang a, I kal leh mit-ah lung a awm mai mai lo ang. I kal (kidney) a hrisel ang a, i taksa pum pui tan resistant a ti sang a, i nat theihna mai tur ang hunah pawh i na mai mai lo ang. Tui in tam lo zir teh, in tlem vang a na tuar a, sum tam tak sen leh buai hrep i pumpelh ngei ang.

Kan taksa hian hna a thawh tak tak theih nan leh kan thisen hi a khal loh nan tui hian a ti dal a, thisen dawtah a kal chak bawk a, a tawp thleng thisen chhia nen a inzawmna a lo chaka, thluak leh taksa a hnathawk hrang khan nuam ti takin an thawk tluk tluk in nuam ti takin an che thei ta ṭhin a. Natna hrik lo lut palh se, thin aṭangin an lawng lian berah an chhuak nghal a, tuifinriata American sawrkarin thlawhna pawh tam tawk phur thei (destroyer – USS Kennedy) ang hi a ni. An kalna hmun a zim telh telh a, lawng tê a kal a ngaih hnuah pawh life boat an hmang a, a tawpah phei chuan ke a kal ngai khawpa thisen dawt, lui tê ang kha chhuahsan in, natna hrik kha bei turin chak thei ang berin an kal ta a. Natna hrik lah kha terrorist ang chiah, hmun chhe lai, intihhliamna emaw hliam tharah emaw awmhmun an khuar ve nghal a. An insiam fel hman chuan thin in sipai ṭha a thawn kha tlem chauh an thleng thei a, natna hrik ho kha inthlahpun nen hmunhma siam nen, an inpeih fel hma a commando ho an thlen chuan an that vek a. An thlen hman loh erawh chuan commando ho kha an lo that vek thung a, an bomb puak leh thil tihchhiat ho kha hnai kan tih ang hian an rawn lang chhuak ta ṭhin a ni.

Hemi kalkawng tak hi thisen dawt a ni a, thisen kha a tuihnang luang ṭawk ṭawk a nih phei chuan an thleng hman ṭhin lo. Chu vang chuan kan thisen hi a tuiril ṭha tur a ni. A tuiril ṭha tih hriatna awlsam ber chu i zun a fim em? tih a ni. I zun a fim kar chuan thisen pawh a tuiril ṭha tih hriatsa a ni. Zun fim ringawt hian natna, zunkawng hnai la, kal ṭha lo leh taksa pumpui chak lohna te, kal leh mit a lung awm tur te, i ruhseh chhuak tur pawh a veng thei in in tihpalh ah pawh a dam hma bik ṭhin. Hengtiang hre reng chung hian tui ila in tam peih lo a nih chuan, a hmasa berah zunkawng hnai la in i buai ang a, hmai a bawl nasa ang a, i tha a za lo sawt ang. Chuvangin a ṭulna avang zawkin nilengin tui litre thum aia tlem lo i in a ngai a ni. Ek leh zun a mawng leh serh silfai hian zing leh tlai bak chu sahbawn nena sil vak loh tur, a chhan chu kan kap vel a natna hrik lo tihlumtu natna hrik awmsa kha kan ti hlum vek a, a buai zawk. ZUN FIM KAR IN AWM LA I NALH ZAWK BAKAH, NA I NEI MAI MAI LOVANG. ###

Lelte Weekly
Hriselna