Zo Rin
HRILENG KARAH INTANPUI TAWNNA A LA AWM ZEL

 Zo Rin 4 July: Hrileng vanga lockdown karah pawl, khua leh mimal, mite tana malsawmna ni tura luang chhuak an awm zel

Khumtung Branch MHIP te chuan Covid-19 hrileng avanga MHIP Day an hman theih dawn loh avangin an day denchhen in khawchhunga mi thilphal te thil thawhkhawm thlai leh thei rah chi hrang hrang bakah anmahni sum senga an lei balhla thahnem tak- ZMC, Falkawn, Motherless Baby Home, Hermon Childrens Home,Durtlang, TNT, Zuangtui, Hmangaihte Run, Samaritan Riang vai Run, Seling, Thingsulthialh PHC, Serchhip Quarantine Centre, Zoar Urban Deprived Childrens Home, Serchhip, Beiseina In, Serchhip ah te nimin khan an sem kual a ni.

Nimin khan N Lungleng VLTF committee te chuan Tawngtai Bethel Camping Centre, Sakawrtuichhun an tlawh a, khawtlang mipui thawh khawm thlai leh theirah pick-up trip hnih hlanin thawmhnaw an hlan tel bawk. VLTF committee member 13 kalin, helai hmun camp-a awm mekte an awmna hmunah an kan kual a, Centre enkawltu/neitupa Pu Zohminga rawngbawlna chu ropui an tih thu an sawi.

Nimina Samthang thlai rawn phur, Sialsuk a chesual chu an thlai phurhte Sialsuk khawtlang ten tlawmngaia an thiarchhuah sak hnu ah New Market Aizawl thlenpui a ni a. Heng thlai te hi Chawhmeh zuar joint association chuan tlawmngaia zuar turin nimin khan hnatlang a ko a. Thlai te hi a chhiat nasat avangin a hralh theih ang anga hralh sakin nilengin an zawrh sak a. Thlaite hi vegetable supply chain kaltlanga zawrh tur anih angin an hralh bang te hi sorkar hotute hnenah hlan let a ni.

Nimin khan Siaha West Pastor Bial Thalai Kristian Pawl, BCM Siaha ten DLTF te hnenah Covid-19 dona a atul anga an hman atan Rs.10,300/- an hlan a, DLTF aiawhin B.Malsawmtluangi, SDO(S) in a dawng. Saikou CCIM, KTP ten covid-19 do nan DLTF,Siaha hnenah Rs. 5000/- an hlan bawk. B.Malsawmtluangi, SDO(S) in DLTF aiawhin thilpek hi a lo dawng bawk a ni.

Zo Rin
Khawtlang