Central-ah Sorkar in-tawm a piang ta a, PM Pu Modi hian kum kha leh chen kha BJP hlang MP te nen India ram a lo hruai tawh a, A mumangah pawh a la man chhin ngai lo, Coalition Sorkar tan hna a thawk dawn ta a, tun term-ah hian he tangrual sorkar hi a kalpui tha thei em le...

Chutih laiin, Opposition an rawn lian dawn hle mai a, Parliament House a Rorel pawh BJP duh ang diak diak in a kalpui theih tawh dawn lo a ni. A lehlamah India ramah Coalition sorkar hi thil thar a ni hran lova, Democracy ram mipui tamna berah hian Party 6 aia tam intelkhawm a Sorkar pawh siam a ni fo tawh thin a, Kum 1989 - 2004 chhung khan Lok Sabha inthlan vawi 6 ngawt lo awm tawh in Single-party Majority a awm lo vek kha a nia.

Kum 1989-1999 hun chhung phei kha chuan Sorkar in-tawm (coalition) Sorkar 8 lai ding hmanin a tluchhe rang hle a nih kha. Khatih laia Ramchhung inrelbawlna pawhin a tuar hle thin a ni. India-in Economic reforms turu ber ber a kalpui leh Growth rate sang ber ber a neih te chu Congress leh BJP te kaihhruai in, Coalition sorkar-ah a lo in nghat fo tawh thin a, Party Sorkar kha an Lal hle thin a, India ram pawh an sawi danglam nasa hle thin a nih kha.

Tun hma a BJP kaihhruai Coalition sorkar a din khan an Ideoloigical leh Polarising Issue pawimawh ber ber te chu an thawhpui te ngenna avangin an hupbet mai thin kha a nia, Mahse an Party Agenda pui ber ber Kashmir Autonomy thiah te, Ram Temple sak te chu Modi hovin tih hlawhtlin a ni tawh a. Kumin hian a thawhpui Party te hian Modi an inthlan dawn a huangtau taka Muslim te, Sakhua dang bia, Kristian te thiam taka an beih vak vakna thin te hi a reh tawh ang em.

Tuna pawimawh ber chu BJP leh an thawhpui ten Major issue-ah eng nge thukhat vuak theihna an neih tih hi a ni dawn a ni. BJP te chuan Mizoram rambuai 1966 hnu, kum 1967 a India in a lo hnawl tawh a ruala Parliament leh State Assembly Inthlan kawp (Sum senral a tlem nan) tia kum 2028 an tin-zawn mek te hi an kaltlangpui zui thei ang em, Tin, Mizo ten kan duh loh em em, Khua leh tui tin te Sakhua, Sex, Gender leh Sexual Orientation thliar lova Uniform Civil Code (UCC) kalpui an tum te hi,.... hei chauh hi a ni hleinem, Parliamentary Boundary kum 2026 hnuah siamthat a ni dawn bawk a sin.

An thawhpui Party lian pahnih, Coalition sorkar siam dawn a, rawn bengchheng nghal, TDP leh JDU te hian an State chu ‘Special Status’ pek an ngiat ve ve kha nia, a huphurh awm viau dawn a ni. Tin, Prime Minister thu lutukna tih-hniam in, Decentralise Governance a kalpui lo thei dawn ta lova, Checks and Balances a sang ang a, Pu Rahul-a te lam Opposition te an huangtau lo thei lo bawk a, chumai bakah Bureaucracy Institution, Judiciary te an zalen zual anga, Term hmasa a BJP sorkarin India Media lian zawng zawng a control a, a lem zo vek ang kha a awm dawn tawh lova, Media ten thudik tak an puang chhuak tawh dawn a, Tin, term hmasa lama Pu Modi’n Project, Scheme etc. tam tak a lo kalpui tawh te a chhunzawm zel thei ang em, An thawhpui Party dang MP 32 chuang te ngaihdan an lak zel a ngai tawh dawn sia, an inlungrual loh chuan ‘Mawngsawh-dawt’ a tlak theihna a ni dawn a ni.

Chuvangin, Kum 19989-2004 chhunga mi hmingtha, BJP PM hlui, Pu Atal Behari Vajpaee’an Multi-Party Coalition hlawhtling tak a lo kalpui tawh thin ang kha, Pu Modi hian a kalpui ve thei ang em, i lo thlir zel ang u le!!!