Nizan khan sorkar laipuia Minister te hna chanpual puan a ni a, Ministry lian 4-ah inthlakna a awm lo. Sorkar hmasa ang tho in Rajnath Singh-a chu Defence Minister a ni chhunzawm dawn a, hetianga bawk hian Amit Shaha'n Union Home Ministry leh Cooperation a chang leh ang a, Union Finance Minister atan Nirmala Sitharaman dah nawn leh niin External Affairs Ministry pawh sorkar hmasa ang thoin Dr. S. Jaishankar chuan a enkawl chhunzawm ang.
Anni bakah hian sawrkar tharah hian Nitin Gadkari chuan Ministry of Road Transport and Highways chu a enkawl chhunzawm ang a. Piyush Goyal pawhin Ministry of Commerce and Industry a chang chhunzawm ang a, Dharmendra Pradhan pawhin Education Ministry a enkawl chhunzawm ang. Union Minister thar zingah JP Nadda chu Health leh Chemical and Fertilizers Minister a ni dawn a. Madhya Pradesh Chief Minister hlui Shivraj Singh Chouhan chu Agriculture leh Rural Development Minister thar atan ruat a ni a.
Union Ministry of Information and Broadcasting enkawl turin Aswini Vaishnaw ruat a ni a, hei bakah hian Railway Ministry a enkawl tel bawk ang. Haryana Chief Minister hlui Manohar Lal Khattar chu Ministry of Housing and Urban Affairs leh Power chang tura tih a ni a, Kiren Rijiju chuan Parliamentary Affairs a chang ang a, Union Minister hmeichhe pahnih zinga pakhat zawk Annapurna Devi chuan Women and Child Development a chang dawn a. LJP leader Chirag Paswan chu Food Processing Industries Minister thar tur niin Jyotiraditya Scindia'n Communications leh DoNER Ministry a enkawl thung a.
BJP thawhpui JD (S) hruaitu HD Kumaraswamy chu Heavy Industries Ministry leh Steel Ministry chang tura tih a ni a. Bihar Chief Minister hlui Jiten Ram Manjhi chu MSME Minister atan dah a ni a, Assam CM hlui Sarbananda Sonowal chuan sawrkar hmasa a lo enkawl tawh Port, Shipping and Waterways Ministry a enkawl chhunzawm ang. JD (U) hruaitu Rajiv Ranjan Singh chuan Panchayati Raj a enkawl ang a, Pralhad Joshi chuan Consumer Affairs a enkawl ang. Textiles Ministry chang turin Giriraj Singh ruat a ni a, Bhupender Yadav chuan Environment Ministry a chang ang a, Hardeep Singh Puri-a'n Petroleum Ministry a enkawl ang a, Mansukh Mandaviya chu Labour and Sports Ministry enkawl tura tih a ni bawk a. Arjun Ram Meghwal chu Law Ministry chang tura tih niin G. Kishen Reddy chuan Coal Ministry a enkawl ang a, Civil Aviation chang turin TDP leader Rammohan Naidu ruat a ni bawk.