Manipur Chief Minister N Biren Singh-a'n Jiribam tlawh a tum na lo thli thlai tura kal chhuak, Manipur CM advance Security team te chu niminpiah chawhma dar 10:30 vel khan T. Laijang, NH 37-ah beih an ni. Chief Minister N Biren Singh chuan nimin khan buaina chhuah thar lehna Jiribam district hi tlawh a tum a, an dinhmun enfiah a tum a ni.

Chief Minister zin tur kaihhnawiha venghimna chungchang endik turin advance team-te hi tirh chhuah ni mah se T. Laijang ah hian beih an tawk ta a, venghimtu zinga pakhat chuan hliam a tuar a ni.

Inbeihna a thlen hnu hian Manipur police commando leh Assam Rifles tangrual chuan a hnuchhui hna an thawk nghal a ni.

Nimina CM Biren Singh-a zin tum pawh chawpchilh taka thulh tir nghal a ni bawk. Jiribam district-ah hian kar liam ta Ningani khan Meitei loneitu pakhat thah a nih vangin hnam pahnih inkarah buaina a chhuak thar leh a, in tam tak hal niin sorkar hmunhmate pawh tihchhiat a awm nual.

Buaina chhuah hnu hian Jiribam district atangin inhumhimna zawngin mi 600 chuangin Cachar district, Assam an pan tawh a ni. Cachar Superintendent of Police, Numal Mahatta chuan Jiribam atanga raltlan tam zawk chu Lakhipur chhehvelah an khawsa lailawk tih sawiin, Manipur nena an inri-na laiah venhimna khauh lehzuala kalpui a ni a, police leh commando dah luh belh an ni tih a sawi.

Assam lama raltlan zingah hian Meitei leh Kuki an awm avangin lungrual taka Assam chhunga an awm ho theih nan nimin khan Cachar SP hian meeting a neih pui bawk.