Thla hlui June ni 27-a Lawngtlai Chandmary MDC bial by-election chu nimin khan chhiar a ni a, MNF Candidate C. Lalsawmzuala chuan thlan tlin a ni. MNF Candidate C. Lalsawmzuala hian 1161 vote hmuin ZPM Candidate F. Hrangtukhuma'n 876 vote a hmu a, BJP Candidate K. Lalawmpuia'n vote 19 a hmu ve bawk a. MNF Candidate hian ZPM Candidate aiin 285 vote a hmu tam a, NOTA-ah vote 5 a tla bawk.

Thlantlin a nih hnuah Pu Lalsawmzuala chuan MDC atana thlan tlin a ni chu Pathian awmpuina vang liau liau a nih thu a sawiin, Chandmary bial mipui chungah lawmthu a sawi a. MNF leh Congress tanrualna rah a nih thu pawh sawiin, a tlin theih nan a beitu zawng chungah lawmthu a sawi.

MNF District Hqrs President Lalzahawma Chinzah chuan LADC-ah MNF-in Party malin sorkarna siam thei mahse Congress nen thawhdunna thuthlung an siam tawh chu MNF chuan tha taka an vawnhim tur thu leh LADC-a sorkar kal lai chu a buai loh tur thu a sawi a.

Lai Autonomous District Council-a Chief Executive Member C. Lalmuanthanga paw'n Congress leh MNF thawhdunna chuan rah tha a chhuah tih sawiin, Chandmary bialah MNF Candidate thlan tlin a ni chu a lawmawm, a ti a; Chandmary bial mipui leh an Candidate intawm thlan tlin a nih theih nana theihtawp chhuahtute chungah lawmthu a sawi a ni.

LADC-ah hian Elected Member 25 zingah MNF chuan MDC 13 a nei mek a, ZPM-in MDC 10, Congress leh BJP-in MDC 1 ve ve an nei mek.