Mara Autonomous District Council (MADC) sorkar hnuaia Chakhei bial Member of District Council (MDC) seat ruak hnawh khah nana by-election buatsaihah BJP-in hnehna an chang. Thla hlui June ni 28-a by-election vote tla te chu nimin chawhma dar 10 khan DRDO Conference Room, Siahaah chhiarin, tluang taka chhiar zawh a ni.

Vote hi Siaha District Election Officer leh Returning Officer ni kawp Pu VL Hruaizela Khiangte kaih hruaina hnuaiah chhiar a ni a; Chakhei MDC bial by-election-ah hian vote awm zawng zawng 1,875 atangin Electronic Voting Machine-ah vote 1,592 a tla a, hei hi za zelah 84.91% a ni. Tluang taka vote chhiar zawh a nih hnuah Returning Officer chuan vote 733 hmutu, Bharatiya Janata Party (BJP) candidate Pu Albert TT Sachu chu Chakhei bial MDC thar atan thlan tlin a ni tih puangin, thlan tlin a nihna certificate a hlan nghal a ni. Pu Albert TT Sachu hian amah hnaih bertu ZPM Candidate Pu T. Essachu vote 43-in a hneh a ni.