Mizo National Youth Front (MNYF) hruaitute chuan inrinni chhun khan Aizawl chawmtu Tlawngluia Water Supply Scheme Phase I leh II an tlawh a, PHE EE C Zothantluanga hoin an lo dawngsawng.

MNYF Vice President Lalnunmawia Pautu chuan department leh thawktute sawisel tura kal an ni lo tih sawiin, "Aizawl khawpui chhunga chhungkaw tinin tui in tur thianghlim tam zawk an dawn thuai theihna tura hmalakna leh hmasawn zelna tur thil tha a awm beseia lo kal kan ni. Cyclone Remal in Mizoram a nuai hma leh anuai hnuah Aizawl khawpui chhunga tui harsatna chungchang au chhuahna neih kan tum mek laiin, furpuiin min nang chhunzawm a ni," a ti.

Cyclone Remal-in khawl a tihchhiat hlimin sorkar thuneituten thla khat chhunga panngai anga tuisem theih an beisei laiin thla khat chuang hnuah pawh harsatna ala awm belh zel pawi an tih thu sawiin MNYF Vice President chuan, "PHE Department thawktuten chhun zan zawmin tui hnianghnar kan neih thuai theih nana hna an thawk hi ropui kan ti," tiin mi harsa zawkte tawrhtheihna tur chhiah lak leh bill tihsan kawngah sorkar a hman hlel hle laiin, mi hausa leh retheiten rualkhai taka tui hnianghnar kan hmuh theihna turah Mizoram Sorkarin a tih tur a ti tawk loa an ngaih thu a sawi.

MNYF chuan Mizoram Sorkar thil tih dik lo pawi leh phurrit zawnga a hmalakna leh a tih tawk lohna kawngah Mizoram mipuite thlavang hauhin a tul angin engtik hunah pawh a che chhuak zel dawn tih an tarlang.