Mizoram Journalists Association (MJA) General Headquarters chuan nimin khan General Body meeting an nei a, an pawl thil pawimawh hrang hrang an sawi ho. Aizawl Press Club-a inkhawmah hian MJA President, C. Lalrambuatsaiha chuan, thuthar thehdarh kawngah Journalist ten tan an lak thar zel a tul thu a sawi a. Social Media platform hrang hrang hmangtu an pung zel a, hei hian thuthar thehdarhtute a run nasa a, a bikin chanchinbu lam-a thawktute chu Social Media-in a eiral mai loh nan an insang mar a, tun aia chak lehzual-a ke an pen a tul thu a sawi. C. Lalrambuatsaiha chuan, pawl reng reng chak tak-a kal tur chuan thawh hona tha an nei a, member-te an inlungrual a tul tih sawiin, MJA member te chu pawl hmalakna ngaipawimawh thar a, thil tihna zawng zawngah an tel vek hman lo a nih pawhin a tam thei ang ber MJA hmalakna tawiawm thin turin a sawm a ni. Inkhawm hi MJA Vice President, C. Lalhmachhuana'n a kaihruai a, MJA member ten an pawl hmachhawp leh hmalakna tura an thil duh hrang hrang an sawi ho a. Kumin June ni 6-a MJA Executive Committee thukhawmin MJA member atana a lak tharte chu MJA President, C. Lalrambuatsaiha'n a lawmlut nghal a ni.