MPCC hruaitu ten nimin Aizawl Press Club-ah press conference an neih naah ZPM kaih hruai Mizoram Sorkar chu Lokayukta kut phuar sak zawnga hmala-ah an puh. MPCC Sr. Vice President Lalnunmawia Chuaungo chuan kan ram rorelna a hlemhletna (corruption) do tura hmanraw pawi mawh ber Mizoram Lokayukta chu kum 5 laia upa ni tawh mahse, ZPM hian CM leh Minister-te pawh chhui thei tur Mizoram Lokayukta chu thuam chak aiin hnathawk tak tak thei lo tura a kut in phuar sak ta zawk, tiin The Mizoram Lokayukta (Amendment) Act, 2024 siam danglam (amendment) hmangin Mizoram Lokayukta chu a pawi mawh na tih hniam a, hna thawk tak tak thei lo tura siam mek a nih thu a sawi. Pu Chuaungoa chuan - Section 11 tih danglamna (amendment) a inquiry wing leh prosecution wing hran siam hi thil tha leh tul a ni nain, section 10 ti danglam a heng wing hotu lute (chief inquiry officer leh public prosecutor) te dinhmun (status) additional secretary level atanga deputy secretary level a tih hniam hian recruitment-ah harsatna a siam theih bakah hna a taka an thawh kawngah harsatna a siam dawn a ni. CM thleng chhui tura an hotu bera dy. secretary level dah chu Lokayukta thuneihna tihniam ttumna a ni. Section 13(3) hnuaia proviso tih dang lama central leh state government hnuaia thawk public servant ni lo, pawl (authority/organisation) hnuaia thawkte prosecute (hrem tura court-a thu thlen) hma a heng pawl thuneitute phalna lak hmasak ngai ta hian thil tisualtute laka hmalak nasa takin a ti khaih lakin a ti harsa dawn. Heng Pawl hotute hian remtihna pe duh lo ta se, Lokayukta hian engmah a ti thei dawn lo tihna a ni, tiin, Mizoram Lokayukta hi a bik taka Dan hran siam a din, investigation agency dangin an chhui phak loh, Chief Minister thlenga chhui thei tura din a ni. Section 14 of Mizoram Lokayukta Act, 2014 chuan hlemhletna thil a investigation agency dangte thuneihna pawh Lokayukta kutah a hlan vek a ni. Mahse, section 14-ah proviso belhin Lokayukta thuneihna chu agency dangte hnenah pawh in hlan ve ta. Hei hi Mizoram Lokayukta pawi mawhna leh thuneihna tih dalna a nih avang leh Lokayukta Act siam a nihna chhan (spirit) tih bawrhban-na a ni. Hei bakah, Section 19(5) leh section 28(1) ti danglam a, he section hnuaia Lokayukta-in thuneih na a neihte chhuh sak a ni hi Lokayukta hnathawk thei lova siam a, state sorkar remtihna la hmasa lova engmah ti thei loa siamna a ni. Hei hi Lokayukta kut phuar sakna hmanrua a ni. Lokayukta Act siam na chhan (spirit) tih bawrhban na a ni bawk.