Chief Minister Lalduhoma chuan nimin khan Chief Ministers Conference Room Babutlangah ZPM Val Upa Council, ZPM Legislature Party leh ZPM General Headquarters Elected OB te chu an thukhawm a ni. Heng inkhawmah chuan hma lam huna party kal zel dan tur leh sorkar inrelbawl dan kawnga hmasawn zel dan tur an sawiho. ZPM Legislature Party aiawhin Chief Minister Lalduhoma chuan thusawiin, "ZPM hi hun harsa tak paltlangin kan inhrualmum a, kan party kal chhoh danah pawh tawrhchhel a ngai thin hle a ni. Mahse, Pathianin a hun takah hna a thawka, mi tamtakin sorkarna pawh siam thei lova tiltiak leh mai tura min ngaih laiin party chhungkua inhmangaih tawn tak kan lo ni a, kan taimak leh induhsak tawn rah kan seng a, mipuite khawngaihna zarah sawrkarna kan siam ta a ni," a ti. "Val Upa council ten fim takin ro an rel a, min uap tlata, kan tlan chak lutuk tur min veng a, kan kal muang lutuk tur min nawr a, kan bana min kaih tlat avangin ZPM party tan chuan an hlu hle a ni." He hunah hian Lal Fakzuala, Chairman, VUC chuan, "Sorkarin ram a kaihhruai dante ngun takin kan lo thlir thin a, sorkar hmasaten ram an kaihhruai danah duh khawp loh lai kan neihte leh kan lo sawisel thinte chingfel tura tun sorkara kan beiseinate sawihona hun kan nei leh thei hi a lawmawm hle a ni. ZPM ministry hi party sorkar ni lova mipui sorkar dik tak din tura beisei kan ni a, chumi lam hawia kal zel tur chuan VUC te hian kan beisei reng che u a ni. Sorkar inrelbawlnaah direct takin in rawlh thei lo mah ila thurawn pe tur erawh chuan thuk takin kan in rawlh zel dawn a, party leh sorkar in tih dik loh an neih pawha khalh ngil tur leh thurawn pe zel turin theihtawp chhuahin in kaiza kan rawn veng zel dawn a ni," a ti. VUC chairman chuan, "Sorkar hmasa tih angte tih ve zel a rem dawn lova, an tih ngam loh thiltha erawh huaisen taka kan tih a tul fo ang, dawih tak leh hlauh nei lutuka ram hruaite hi hmasawn lohna pakhat a ni a, midangte ngaichang lova thu duh lutuk pawh thil tha a ni chuang lo. Kawng engkimah Pathian kan dah hmaksak zel hi a finthlaka, sorkar hma aiin a letin tawngtai tam a tul hle ang, Bible leh Pathian rawn hnem leh zual turin ka duh che u a ni," a ti. ZPM General Headquarter President Lalliansawta pawhin thusawiin, "Pathian leh mipui zarah kan kuatah ro relna a lo tla ve ta a, kan chungah mipuiin rinna an nghat a, mipuite hi kan tibeidawng ve thiang lo a ni. Party ve ta fam chu leh lam pawlten min rawn bei ve ta malh malh a, keini ZPM erawh chuan dawh thei takin kan thil tih mhangin kan chhang zel dawn a ni. Chumi tur erawh chuan kan hnathawhte ram leh hnam rotling a ni tur a ni. ZPM te chuan eiru lo turin kan intiam a, kan eiru lo mai ni lovin kan hmuh phakah eirukna a awm lohna turin Pathian hrereng chunga kan kal angai a ni. Mipui hmaa kan intiamna hi Pathian hmaa kan intiamna a ni tih hrereng ila, Pathian tihna nen ro rel zel turin kan in sawm nawn leh duh a ni," a ti bawk.