US inthlanpui Nov.5 a lo awm tur a ni, Donald Trump a awmna Republican Party ten hmuh theih khawp a boruak an siam len zel laiin, President hna chelh mektu Joe Biden a awmna Democratic Party an buai hle a, an Presidential Candidate tura alo chhawp chhuah tawh, tuna President nilai, Joe Biden chu Debate a a chetchhiat avang leh a hnuah pawh a Upat avang leh a Memory that tawk tawh loh vanga an puh chhiat laiin, din tlang a tum zet a, mahse, kil hrang hrang atanga an Party ten ding lo tura an nawr luih luih takah chuan a in-hnukdawk ta thut mai a, a aiah hian Kamala Harris thehchhuah tum a ni a, hei pawh hi boruak a la in sual viau a, ding tlang tura ngaih a ni. US President 46-na Joseph R.Biden (81) chuan Democratic party atanga nawrna nasa tak vangin, ngun taka a khawnbawl upa ten a rawn hnuah Sunday tlai khan American mipuite hnenah thupuan chhuah neiin, US Presidential Election 2024 atan, President 47-na ni turin chuh zui a tum loh thu leh election campaign a neih mek a chawlhsan tak thu te leh a Vice President ni mek Kamala Harris (59), amah aia kum 22 zeta naupang zawk chu a ken thu te, Kamala Harris chu thawhpui nuam leh tha tak niin, amah chu thlawpa vote theuh turin ka ngen a che u, tiin thupuan a nei thut mai a, he thil hian thenkhat mak tih a hlawh laiin thenkhat erawhin Biden-a chu a thutlukna siamah huaisen leh fin thlak an ti a, an fak hle thung. President Biden hi Democratic party hruaitu challang tak tak House Speaker hlui Nancy Pelosi, President hlui Barack Obama, President hlui Bill Clinton leh a nupui Hillary Clinton te bakah Democrat Senator engemaw-zat leh Senate Majority hruaitu Chuck Schemer of New York te leh Congressional member ten a campaign boruak thlirin leh a hriselna te leh a kum upat vanga tar chak tawh loh vang te in lo chawl a, 47th US Presidential Election chu chuh zuilo tawh turin an lo ti ti pui tawh a ni. Amah thlawptu lar tak Hollywood star George Clooney pawhin chawl ngam turin a lo hrilh tawh bawk a. Hetianga US President term 2na atan chuh a tum loh thu vantlang mipui hriat a puang chhuah hnu lawkah Democrat hruaitu lawk zualte chuan an fak hle a ni. Republican party official Donald J.Trump (78) chuan Joe Biden-an White House luah zel lo tura inbeihna leh intliarna awm mek a chawlhsan tih a puang hnu lawkah CNN leh a Truth Social platform hmangin a rawn bei nghal chat mai a: Crooked Joe Biden chu President turin a tling thlawt lova, a tling ngai hek lovang! dawt leh Fake News vanga President rawn ni chho ve mai mai a ni, a tawmkuk (Basement) a chhuahsan thei lova, chu chu a bul vela awm Doctor, Media leh Advisers ten an hre chiang hle a ni. En teh u, kan Ram a tih chhiat nasat zia hi. Ramri chu mi maktaduai telin an rawn pan ruih ruih a, chung zinga mite chu mi firfiak pawikhawih hreh lo (terrorist) te, tang chhuak te, rilru chianglo leh dik lo te an ni. A President chhungin kan chhe nasa in kan tuar hle ang. Ramriah dan lova lo luh tumte an in se hmur tau tau a, a hna thawh chhe tak chhunzawn turin Kamala Harris chu a tha ber ang. Biden chu President turin a fit thlawt lo. A thiltih chhiat te hi, hawh u, a damdawi zawngin siam thain i tidam thuai ang u. MAKE AMERICA GREAT AGAIN..." tiin. House Speaker Republican Mike Johnson pawhin, President ang pawhin hna thawh theih tawh loh chuan lo chawl tawh se, Democratic party candidate a chawlhsan dawn chuan US President hna pawh lo chawlhsan ngahal rawh se, tiin Biden chu in resign nghal turin a ti a, White House chu puan thuah tela chhuahsan a, bang mai turin a phut zui a ni. Hetianga US President ni mek lai ten, Presidential Election dawn hnaiah an chuh zui leh dawn lo tih hi an puang zen zen ngai lova. Democrat leh Republican a barakhaih hle. June 27 khan Biden leh Trump ten an ram hruai tum dan chung chang a h inchapcharna (debate) an neih tum khan Biden chu a che tha lo hle a, khami hnu atangin Democrat tam tak, chung zingah House member ni mek mi 37 laiin lo chawlin, kiang mai se, tih ngaihdan an sawi chhuak sup sup a ni. AP-NORC Survey chuan Democratic party atangin 65% zet chuan Biden chu chawlin, President chuh zui tawh lo se an duh a ni, a ti. An party chhunga Primary Election neih mekah Biden chuan vote makta duai 14 zet a hmu tawh a sawi niin, mahse, a chawlhsan ta thut si. An party aiawha palai (delegate) vote 3,896 lai a hmu tawh a, American Samoa state tel lovin, chung vote chu tu mimal hnenah mah US Election dan angin a hlan chhawng ngawt thiang lova, chuvangin a aiawha ding tura tih Kamala Harris-i tan pawh danin a phut angin delegate vote tam tak, Democratic National Convention (DNC) Chicago-a an neih hun Aug.19-22 ah khian vote hmuh tur zat 3,900 a hmuh tlin a ngai dawn a ni. Candidate chang turin nem ngheh nan palai kalkhawm te vote 3,900 tal an hmuh a ngai a, chumi hmu phak an awm loh chuan "Superdelegate" an tih mai mi 700 ten an vote tha leh ang a, chumi zawhah palai votes 4,600 vel talin an nem nghet (endorse) thei chauh dawn a ni. Kamala Harris chuan Biden-an a aiawh chhova US Presidential nomination chang tura a ruatna chu "in duhsakna leh chawimawina ropui takah ka ngai a, mahni hmasial a awm lo leh ram leh hnam hmangaihna (selfless, patriotic act) thiltih a ni. Democrat hote tangrualin Trump-a hneh ngei turin leh a extremist agenda an tih, Project 2025 agenda chu tihbo a ngai a ni, I tangrual tlat ang u", a ti. He Project 2025 hi conservative thenkhat ruahman niin an sawi a, mahse, amah Donald Trump chuan mi firfiak (extremist) ka ni lova, chuan extreme Project 2025 chu ka hre ve hauh lo ve, tiin a lo sawi tawh a ni. NBC News chuan tun thla tirah mipui ngaihdan lakna a siamah Kamala Harris hi a sang vak lo a, 32% chauh a hmu a ni. Democrat hruaitu lar Barack Obama, Sen. Schumer, Sen. Warren Elizabeth, Four Squad an tih mai, Congressional member Alexander Ocasio-Cortez, Nancy Pelosi ten Kamala Harris an thlawpna an la chhuak chhuak chiah lova, mahse, Biden-an President chuh zui a tumlo erawh an fak hlawm a ni. Biden hian campaign a neih mek laiin July 17 khan Covid-19 a vei vangin a campaign a chawlhsan a, X (Twitter) ah "Ka dam lo" tiin a rawn ziak a ni.