Aizawl Press Club-a thuthar thehdarhtu te an kawm naah MNF General Hqrs Legal Board Vice Chairman Pu Lalpianfela Chawngthu chuan ZPM sorkar chu CBI chhui tur leh chhui loh tur case thlan kual vel nana hun khawhral lo turin a ngen tih sawiin, sorkar phalna ziaka an neih phawt loh chuan CBI-te che thei lo tura siam an nih rual deuh thawa ZPM Legal Dept. ten Lokayukta-a case thlan chhuak bik pathum (3) chauh CBI chhuitir tura ngenna lehkha an thehlut nghal hian entir dang a nei lo a, ZPM sorkar leh Chief Minister hian an huat zawngte chauh CBI chhuitir a, an lamtang leh an mi leh sate erawh hum zel an tum zia a lantir a ni, a ti. Politics-a phuba lakna hmanruaa CBI hman an tum dan lo lang chhuak nghal hi thil vanduaithlak tak, Mizorama la thleng ngai lo leh Kristian rama thleng atan pawha mawi lo tak niah mipuiin an ngai tih a sawi bawk. Home Dept. hnuaia Open Tender lem tih chhuah dan te, Lok Sabha MP-in Mizorama Grape chingtute chanai tur, Market Intervention Scheme (MIS) hnuaia 35% (Rs 100 lakh chuang zet) a lo fanghma no ei thu, amah ngei pawhin ZPM party Office-a a lo puan chhuah tawh te, Buhfai Supply-tu tur thlan kawngah dan kalha a chhang hniam ber ni lo, an duhsak zawng an pek avanga mipui sum tam tak luangral tur chungchang te, Work Supervisor invuaha party worker te hnena dan kalha Contract hna pek chungchangte chu ZPM sorkar hian eirukna, CBI hmanga do an tum tak tak a nih chuan chhuitir tel turin an ngen nghal turah an ngaih thu a sawi bawk.