MNF Legal Board chuan Court lungawina khawpa hmalakna ZPM sawrkarin a neih theih loh avanga High Court-in CBI kuta Kuhva chungchang chhui tur thu a pek a ngai ta chu sawrkar tan mualpho na nasa tak a nih bakah dan leh thupek (law and order) kenkawh kawnga sorkar hlawhchham zia tilangtu a ni, an ti. Kuhva smuggling chungchangah thla khat chhunga Kuhva Smuggling tih tawp tum tu ZPM kaihhruai sawrkar lakluh anih atanga thla 2 dawn ral hnu, 22.1.2024-ah khan Gauhati High Court Division Bench meuhin state sorkar chu FIR lo lut tawh bawhzui tur emaw, a tul a nih chuan FIR thar pawh ziak lut tur emawin thu a pe a, thla 5 dawn ral hnuah pawh ZPM sorkarin hmalakna a neih loh avangin 17.5.2024 khan Gauhati High Court Chief Justice thutna Division Bench chuan Chief Secretary leh Champhai Police Station OC te chu an hmalak dan tarlan na Affidavit mimala theh lut turin a hriattir a ni an ti. MNF Legal Board chuan, Sorkarin an ukil te kaltlanga he case hi CBI kuta hlan lova State police te chhuitir tura tum 2 zet an ngen chungin 18.7.2024 a lo thlen meuh chuan an tang zo ta lo a ni. High Court chuan order a tih chhuahah Mizoram sawrkar enkawl na hnuaia hnathawk te chhui phalna General Consent chu hnuhlet (withdraw) leh tawh ni mah se, General Consent sawrkarin a lo pek tawh changchawi in Kuhva smuggling chungchang hi CBI chhuitir turin thu a ti tlu ta zawk a ni, an ti. Ni 22.1.2024 a thupek khauh tak Court in a tih chhuah hnuah pawh Court lungawina khawpa hmalakna ZPM sorkarin a neih theih loh avanga High Court in CBI kuta Kuhva chungchang chhui tur thu a pek a ngai ta pawh hi sorkar tan mualpho na nasa tak a nih bakah dan leh thupek (law and order) kenkawh kawnga sorkar hlawhchham zia tilangtu a ni, an ti bawk.