US president thlanna neih tur boruak a hot chho zel a, Democrats lamin an presidential candidate la puang lo mahse Joe Biden aiawh tura ngaih, Kamala Harris chu Republican candidate Donald Trump aiin kumin kumtawp a inthlan neih turah a chak zawk ring an tam rih tlat mai a, enge a an zel dawn le. President thar thlanna a a tling tur zawk a mipui ngaihdan lakkhawmna hnuhnung berah Harris chu 44% in hnehna chang turin an ring a, Trump chu 42% in a tlin an ring ve bawk. He poll hi US president, Joe Biden-a president candidate a nihna atanga a inhnuh dawh tih a puan hma kha chuan Trump hian poll-ah hma a hruai a ni. President thlan tura mipui ngaihdan lak hi US ram pum huapa neih ni mah se US chhunga state thenkhat, chak zawk tur a chian lohna state-a che tha tan hnehna chan theihna sang tak a awm a ni. US mipui ngaihdan lakah hian voter zinga 56% chuan Harris hi harsatna hmachhawn turin a rilru a hriam that bakah chingfel turin theihna a nei niin an ngai a. Biden kha chu vote thlak thei zinga 22% chauhin hetiang theihna nei angah an ngai thung. Democrats party chhunga mi pawimawhte thlawpna a dawng tawh Harris hi Thawhleh ni khan Wisconsin-ah a campaign a ni. Democrats aiawhin president inthlan chuh turin Kamala Harris hi ruat a la ni lo thung a, mahse a campaign team chuan delegate an mamawh zat an nei tawh niin an sawi a, August thlaa Democrats convention neih hunah Harris hi president inthlan chuh tura puan a nih ngei beisei a ni. Hetih lai hian Republican Party pawhin hma an sawn zel a, Donald Trump pawh an campaign zel dan tur leh Kamala Harris nen an debate dun dan a zirin tling thei tho a ni bawk.