Inrinni chhun khan, ZORO bultumin Zohnahthlak pawl pahnih, Chin National Front (CNF) leh Zomi Re-Unification Organisation (ZRO) hruaitute chu anmahni leh anmahni inkara inhmuhthiam lohna awm chungchangah remna kawng zawngin Adviser to CM Lalmuanpuia Punte office-ah an bia. Chin National Front (CNF) leh Zomi Re-Unification Organisation (ZRO) te hi kumin May thlatir khan in hmu thiam lovin silai hial chelek a nih bakah nunna chan engemaw zat an awm a. Hetianga unau in hmelmak hi tha ti lovin Zofa hmun hrang hranga chengte inpumkhatna atana hmalatu Zo Re-Unification Organisation (ZORO) chuan inremna a neih theih nan palai hna a thawk a. An hmalakna ang hian ZORO Vice president leh Adviser to CM nibawk Lalmuanpuia Punte pisa ah inrinni khan heng pawl pahnih hruaitute hi an inbia. Thu pawimawh hrang hrang ngun taka an sawi ho hnuah thawhhona tur thutlung hmasa an siam a. Chu thawhhona thuthlungah chuan, keini Zofate (Chin-Kuki-Zomi/Mizo) hi thlahtu thuhmun, different dialect), tawng khat hmang (same language nunphung thuhmun, serh leh sang inkhawih pawlh, beiseina thuhmun vuan a, dam leh tlang khatah, thih leh ruam khatah ti thin unau kan ni a. Ram leh hnam tana hma kan lakna kawngah kan thahnemngaih luat avanga unau kan inhmu thiam lo hi pawi kan ti a, tun hnuah thleng tawh lo se kan duh. Inremna tluantling a awm theih nan a tul dan a zira inbiakna neih leh nise, an ti bawk. Chin National Front (CNF) leh Zomi Re-Unification Organisation (ZRO) inbiakremna inkhawm hi ZORO president R. Sangkawia’n a kaihruai a. Inbiaknaah hian ZRO aiawh mi 6 bakah CNF aiawh mi 8 an tel a. ZORO atangin mi 10 an tel bawk.