Chief Minister Lalduhoma chu tuna Mizoramin a mamawh hmasa chu inkalpawhna kawng tha zawk leh tam zawk neih a ni, a ti. Nimina NITI Aayog Governing Council thutkhawm vawi 9-na Prime Minister Narendra Modi kaihhruaina a New Delhi a buatsaihah he thu hi sawiin Lalduhoma chuan tun dinhmunah Mizoram chhunga kawng awm zat chu rampum huap dinhmun ngaihtuahin a la tlem hle a ni a ti a. Viksit Bharat 2047 Mizorama a hlawhtlin theihna tur thil pawimawh hrang hrang a thlen nghal bawk. Chief Minister chuan, NITI Aayog in State Institution for Transformation of Mizoram atana tanpuina a pek avangin lawmthu a sawi a. Finance Commission 16-na hnena Mizoram mamawh zual pui an thehluh te chu Viksit Bharat 2047 a hlawhtlin theih na'na thil pawimawh tak tak te an ni, a ti a, zirna, hriselna, tui, kawlphetha siamchhuah, faina leh inrelbawlna rotling tur lian tham din kawnga indaih lohna pawh a la nasa niin a sawi a. Mizoram mipui zatve aia tam khawpuia cheng an ni a, khawpui fel fai leh leilung chhiatna laka him, state hmasawnna bulthut (growth centre) ni thei neih Mizoramin a mamawh a ni a ti a. Khawpui leh thingtlang mipuite lakluh inthlau lutuk tihbo na'n te, hna thar tam zawk siam a nih theih na'n te Handholding Policy, a sorkar chuan a kalpui dawn thu a sawi a. Hemi atan hian central sawrkar hian a bika tanpuina (special package)-in Mizoram tanpui pui se an duh hle a ni a ti. Mizoram chuan state dangte aiin hmasawnna a kalpui tlai bik a tih pawh sawiin a awmna a kil khawr avangin nitin khawsak senso leh hmasawnna hnathawhna senso pawh a sang bik a ni a ti a. Heti chung hian midangte hnunga kal reng ringawt erawh an tum hauh lo tih sawiin Sustainable Development Goals tihlawhtlinna lama Mizoram kal chak dan hian state dangte umpha tura sorkar leh mipuite tumruhzia a tilang a ni, a ti. India hmarchhak state te hian leilung awmdan vang te, hmasawnna ruhrel lama an la hniam vang tein Industry lian a tlem a, sum hnar an tlachham bik niin a sawi a. A bika hmarchhak state-te'n harsatna an lo hmachhawnna tur; zalen zawka hman theih tur sum leh pai awm thei se, an tangkaipui hle ang, a ti a. Ministry tinin an sum ruahman atanga za zela 10 hmarchhak state-te tana an ruahman dan chu inkaihhruaina mumal tak duan ni se, sorkar laipui hnuaia company-te pawhin an Corporate Social Responsibility (CSR) sum za zela 10 vel tal hmarchhak state ah hmang thei se, tiin a rawtna a thlen bawk. Chief Minister chuan, Viksit Bharat tihlawhtling turin remna leh muanna neih a tul hmasa tih sawiin Mizoram chu ramdang pahnih karcheh leh a thenawm rama harsatna thleng te vanga chim buai reng a ni a. Venhimna lam (security related expenditure) hmang a sum pek ve chiah lo a nih pawhin central sawrkar chuan 'Peace dividend' tal Mizoram tan ngaihtuahsak se a duh thu a sawi bawk a ni.