Ex MNA President C.Zama chuan nimin khan Aizawl Press Club ah chanchinbu mite kawmin kum 1984 a State Bank Churachandpur Branch rawka puh Ex-MNA pathumte chinfel an nih thu a puang. Ex-MNA President chuan, kum 2005 khan Manipur Chief Judicial Magistrate thupekin Sgt. Lalzarliana leh Pte. Biakhluna te manna thupek Mizoram Police-ah an rawn thawn a. Man an nih hnuah Chief Judicial Magistrate Churachandpur court-ah hruai tura tih a ni. Pte. Biakhluna chu manin Kolasib Jail-ah dah luh a ni. Sgt. Lalzarliana chu a zinbo avangin an man lo va. Pte. Biakhluna hi Jail atanga lakkchhuah a ni a. Doctor in an damloh avangin Certificate an ziak a, Chief Judicial Magistrate-ah certificate chu thawn a ni a, an man ta lo a ni. Pte. Vanlalhruaia hi a in report thin avanga man tura tih a ni lo. MNA 3 te hi State Bank Churachandpur Branch rawka puhte hi- Sgt. Lalzarliana s/o Lalhmingthanga Thenzawl, Pte. Biakhluna s/o T. Lalhnema Kolasib leh Pte. Vanlalhruaia s/o L. K. Siama Thingkangphai Churachandpur te an ni. Churachandpur Police Station FIR no 303 (6) 1984 hmangin thubuai ziah luh a ni a, A hnuah silai kawl thubuai pek belh leh a ni. He thubuaiah hian Advocate N. Koteswar Singh chu Ex-MNA aiawha ding tura rawih a ni a, Mizoram sawrkar aiawha ding turin Advocate Serto T. Kom (Athang) rawih a ni bawk. Ni 23/7/2024 khan he thubuai hi tihtawp a ni. Case tifel tura hma lak a nih lai hian India sawrkar hruaitu hrang hrang Ex-MNA chuan hmuin lehkha ziaka pein case ti tawp turin an ngen a, lehkha an pek zawng hi 30 aiin an tam thu an sawi. Press Conference hi NDTV-ah vawi 2 tihchhuah tawh a ni, Sgt. Ex-MNA President chuan, Lalzarliana chu case rip tak a neih avanga rilu na ngawih ngawihin case tihfel a nih hmain mual a liam ta a ni, a ti.