Central Bureau of Investigation (CBI) chuan nimin khan Delhi chief minister leh Aam Aadmi Party (AAP) hruaitu, Arvind Kejriwal lakah Delhi excise policy kaihhnawih a eirua an puhna chungchangah charge sheet an theh lut tawh a. Central agency hian Rouse Avenue-a special CBI court-ah charge sheet hi an theh lut a ni.

AAP national convener, Kejriwal hi March 21 khan Enforcement Directorate (ED) chuan excise policy kaihhnawih vekah hian sum ti chingpen a puhin an lo man tawh a ni. Supreme Court chuan he thubuai bikah hian interim bail phalsak mahse, CBI hian eiruk thubuaiah an man bawk vangin jail-ah a la awm chhunzawm tho a ni. CBI hian June 26 khan Tihar jail-a a tan mek laiin an man ve leh a ni.

Delhi Excise policy 2021-22 hi Delhi-a AAP sorkarin khawpui chhunga retail-a zu zawrchhuah dan siamthat na tura a duan niin, November 2021 atangin hman tan a ni. He policy hi zu atanga chhiah tam zawk lak luh leh, phalna nei lova lo zuarte do letna tur te, consumer-te tana him zawk tur anga an duan a ni. Mahse policy kalpui dana thil dik tawk lo a awm nia puh a nih avangin, August 1, 2022 khan Delhi sorkar chuan he policy hi a titawp zui ngal a ni. Hemi hnu hian thil dik lo awm nia sawi chu federal law enforcement agency - CBI leh ED hian an chhui zui a ni.

July 2022 kha lieutenant governor VK Saxena chuan excise policy-a thil dik tawk lo awm nia sawi chu CBI chhui turin a thlen a, anni hian Prevention of Corruption Act, 1998 (PC Act) hnuaiah eirukna awm nia sawi chungchang an chhui zui a ni. April thla khan Kejriwal hi thu zawhfiah ni tawh mah se, eiruknaah hian mawhphur tu a puhna a awm lo thung. Agency hian mi 17 lakah charge sheet hi theh lut tawhin, an zingah hian Delhi deputy chief minister Manish Sisodia leh Bharat Rashtra Samithi legislator K. Kavitha te pawh an tel.