Vairengte daia Mizoram leh Assam inrinaah Assam lamin tun hnai khan nasa taka hmathar la in, ramri venhim leh thuamchak kawngah a rang lama hma la turin MNF Serlui North Block chuan Mizoram sorkar an phut.
MNF Serlui North Block te hian tun hnai khan Vairengte Aitlang zaua kuthnathawktuten harsatna hrang hrang an tawh leh Police Duty dinhmun leh harsatna an tawh hrang hrang te a hmuna enfiahin an kal a. Assam lam hian an Police te awlsam leh nuam zawk a, an inkalpawh zung zung theihna tura tan Vairengte Sabual muala Pu Phirthanga leilet an laih leh Pu J. Samuela huana JCB/Hitachi hmanga kawng an rawn lai thar nasa hle tih hmuhchhuah a ni, an ti.
He tih mek lai hian tun hnai ni 29th July 2024-a Home Minister-in thuthar thehdarhtute hmaah, kan sorkar hnuah ramriah status quo bawhchhiatna thar a la awm lo niin kan hria tia a sawi chu pawi tih thu sawiin, Vairengte mipuite kan rilru a na hle a ni, an ti. Home Minister-in thuthar thehdarhtute hmaa status quo chhungah hma thar lakna a awm lo a tih ni nimin Dt 29.7.2024 ngei pawh khan Assam sorkar hian Vairengte Aitlangah kawng a la lai reng a ni tih Home Minister hian a hre lo der nge Mizoram sorkar hriat ruk puiin Assam sorkar hian kawng an lai tih hi MNF Serlui North Block te chuan kan zawhna a niin kan Home Minister hian Zoram mipui hmaah dawt chiang taka a sawi avangin, ngaihdam dil turin kan phut a ni. Ramri venhim leh thuam chak turin kan sorkar hian a ranglama hma laa Assam sorkar in status quo chhunga an hmalakna hi tihtawp tir nghal turin an ngen thu an sawi. MNF Serlui North Block te chuan, kan ram an laihchhiat vek tawh hnua ni 9-10 August 2024 a Mizoram sorkar leh Assam sorkar te Home Secretary level-a remna kawng zawnga inbiak an tum mek chauh hi kan sorkarin ramri a vei tawklohzia leh ralkhat atang chauha ramri vei sorkar an nihzia a lantir a. MNF sorkar anga huaisen taka ramri humhalha hma la turin ZPM sorkar hi kan ngen a, kuthnathawktute harsatna hrethiamtu mipui sorkar ni a an insawi ang ngeiin a taka chechhuak turin kan ngen, an ti a.
Vairengte Aitlang laihlawn/lei kuthnathawka eizawngtute feh kawng leh Mizoram Police ramri venga Duty te chakkhai lakna ber chu ni 30 chuang zet lirthei eng chi mah kaltlang thei lo a awm chu ni 29.07.2024 a kan Agriculture Minister Vairengte pal tlanga N. Chawnpuia rawn khuallianin kuthnathawktute harsatna hriatpui lo leh a hmunhmate tlawh lova Vairengte min chhuahsan leh mai chu pawi an tih thu an sawi bawk a ni.