Mizoram Youth Commission (MYC) Chairman Malsawmzuala Ralte chuan Mizo thalaiten ram pawn thlenga eizawnna an neih theih nan hmalak zel a ni, a ti. Lunglei Convention Center-a Cooperative chungchang zirhonaah nimin khan he thu hi sawiin Malsawmzuala Ralte chuan MYC kaltlanga Mizoram sorkarin All India Service-a Mizo thalai a tam thei ang ber tling tura hma a lakna, Super IAS tih thin chu Mission UPSC tia thlak a ni a, thalai lehkhathiamte All India Service-ah nawr luh zel tum an ni, a ti a. British sipai-ah Mizo thalaite an luh theih nan hmalak mek a nih thu pawh sawiin Cabin Crew-a Mizo nulate an luh theih nan Indigo Airlines Company leh Mizoram Sorkar chu an indawr mek, a ti a. Mizo thalaite eizawnna atan Japan thiamna hman tum a nih dan te leh Hotel Management leh Skill development lamah te tan lak zel a nih tur thu a sawi bawk. MYC leh Lunglei District Cooperative Union ten Cooperative chungchang zirhona an buatsaihah hian thu-pui thlan bik hrang hranga mithiamte thuziak ngaihthlak a ni.