"Mizoram hian MLA term 4/5 tlin ai chuan Mizorama mi retheite leh kuthnathawktute dinchhuahna tura lungphum phuma term khat MLA nih pawh a tha zawk, tiin Vanlalhmuaka BJP president chuan a sawi. BJP Mizoram chuan Karthar inhlanna nimin khan an office-ah an nei a. An president Vanlalhmuaka chuan, Mizoram MLA-te hian MLA nih hi kan duh tawk mai thin avangin Mizoram chu State rethei thawhchhuah nei lo, Chawmhlawm ni si chapo kan ni ringawt mai hi a zahthlak takzet a ni, a ti a. Central Budget kan zir chian a ngai a, Budget mila kan kal thiam a, kan inher rem thiam a pawimawh, a ti a. Kan State a kan Manifesto mila Central ah Sum zuk dil ngawt chi a ni lo, kan mamawhte Budget mila kan hai chhuah a ngai a ni," a ti. Pu Hmuaka chuan sawi chhunzawmin, "kan thuziak mi te'n State dang Kristian pawh nilo CM-te hnathawh that thu Mizoram mipuite hnenah an ziak kur duah a, kan State CM hnathawh that erawh ziah tur an hre lo thung a ni. Kristian ram hian zir tur kan ngah hle mai. Kan tih tur awm tak ringlo mite'n an tih tlat chuan kan Kristianna hian keimahni ngei pawh min hnehlo tihna a ni a, kan in enlet a ngai hle a ni. Tun Union Budget 2024-2025 thar ah pawh Insakna tur budget a awm a, hei hi a nihna ang taka kalpui ve tawh a, Mizoram hmel ti tha tura kan hman thiam ve a tul ta hle a ni," a ti.