MNF Party chuan ZPM Sorkar chu uchuak taka mahni leh party mite vulh chunga Zoram mipuite hrek mektu ah an puh.

Nimin khan Aizawl Press Club-a thuthar thehdartute hmaah MNF Media & Publicity hruaitute chuan ZPM sorkar demna thu hi sawiin, ZPM Sorkar chu thla sarih chung an sorkar hnuah inrenchem leh sorkar sawhnghet zawnga hmalak intiam chung si a, an intiam lo ang hlira an kal avangin Zoram mipuite an vanduai hle hle a ni, an ti a.

MNF Media & Publicity hruaitute chuan ZPM sorkar chu an party mite Mizoram sorkar a dinhmun pawimawh hrang hranga tul lo taka hna chelh tirah puhin Mizoram sorkarin a hlawh a pek thenkhatte hlawh pawh nasa taka an pun thu an sawi a, MLA mahni in a chengte chauhvin an dawn thin house furnishing pawh MLA zawng zawngten an MLA term kum khatnaah nuai 2, kum dang zelah sing 5 an dawn tawh dawn thu te, MLA te tan housing loan pawh cheng nuai 20 atangin cheng nuai 30-a an tihpun tur thu an sawi a, MLA te lirthei leina loan tihtawp tak pawh ZPM sorkar chuan an tihnun thar leh bakah a hma lama nuai 4 ni thin chu nuai 15-a an tihpun thu an sawi.

MNF Media & Publicity hruaitute chuan MLA fund chu nuai 150 atangin nuai 200 a tihpun a nih thu an sawi bawk a, MLA PA te hlawh pawh ZPM Sorkar chuan Rs 20,000/- atangin Rs 35,000/- ah an tipung a, AMC a Mayor hlawh chu Rs 31,000/- atanga Rs 65,000/- a tihpun a nih thu leh Lunglei Municipal corporation Chairman hlawh pawh cheng 27,500/- atanga cheng 62,000/- a tihpun thu sawiin sorkar tharin suma sen belhna tur a siam zawng zawngte chu kum nga chhunga cheng nuai 13,415.84 a nih tur thu an sawi.