Myanmar lam atanga Mizoram kaltlanga nungcha tawlh ruk man chhuah chu a vaiin 166 a tling tawh. Mizoram Environment Forest & Climate Change Dept hnuaia Wildlife Division hotute sawi dan in, Mizoram kaltlanga nung cha tawlhruk zingah hian sazu chi khat guinea pig a tam ber a, 20 lai man chhuah a nih bakah vaki chi khat, sulphur crested cockatoo leh saphai, ball phython 18 ve ve te chu ramsa tawlhruk man chhuah tam ber pahnihna an ni.

Wildlife Division hotute sawi danin nungcha tawlhruk te hi khawvel pum huap ang pawh a man to tak tak te an ni hlawm a, Mizoram chung ah tak chuan lei tu an awm an hriat loh thu leh phai lama thawn tur an nih deuh vek thu an sawi.

Nungcha tawlh ruk man chhuahte hi a enkawl danah Wildlife hotute chuan anmahni pawh an inzir belh thin bakah mi thiam tam tak an rawn thin thu an sawi a, nungcha thenkhat chu a tawlh ru tuten chaw an pek that loh avang leh bawm chep tak taka an khung thin avangin an chauh thu leh a then phei chuan an thih phah hial thin thu an sawi.

Nungcha tawlh ruk a hluar avangin Aizawl Sahuan pawh a chep phah thin thu leh nungcha tawlh rukte dahna tur pawh theih ang ang a ngaihtuah a nih thin thu sawiin, Aizawl Lungverh-a Mizoram Police ram pawh Aizawl sahuan ram atan Mizoram Sorkar chuan a sahthlak sak a, Sahuan a ramsa leh nungcha-te tan tui pawh a hma ai a tam lak a nih tawh thu an sawi bawk.