MNF Legal Board chuan nimin khan Aizawl Press Club-ah press conference neiin, Mizoram State Commission for Women (MSCW) Chairperson atan dan loin Lalchhandami d/o Hranghrima (L) chu dan loa ruat a nih thu sawiin, bang turin an phut. MNF Legal Board chuan MSCW Act, 2004 hnuaia rules-ah chairperson atan kum 65 pel tawh thu ruat theih a nih loh thu chiang taka a inziah thu sawiin, "Sorkar document hrang hrang leh kohhra record-ah Pi Lalchhandami hian chairperson atana ruat a nih hian kum 68-na a hmang mek tawh tih chiang takin a lang," a ti. MNF Legal Board tarlan danin, kum 2021 AMC inthlanah January 10, 2021 khan ama Facebook page-a mipuite vote tura sawmna flyer a dah chhuahah pawh khatih hunlai khan kum 63 mi a nih thu a tarlang. MSCW chairperson atana ruat a nih hun March 2024 ah danin a phal chin kum 65 a pel tawh tih amah vote tura mipui a sawmna hian a ti chiang.

Baptisma a chan hun record-a vawn atanga a lan dan pawhin a pian kum chu ni 30.3.1956 a ni. Hei bakah hian March 31, 2016 khan kum 60 a tlin tawh avangin sorkar hna atangin superannuation pension-in a chhuak.

MNF Legal Board chuan MSCW member pasarih zinga pathumte an hun a lo tawp lo leh anmahni pawhin banna an thehlut lo chungin August 28, 2024 khan notification luahlanin, member pasarih an ruat hnan leh tih tarlangin, "Hetianga dan bawhchhia-a MSCW chairperson ruat mai duhtawk loa, member dinglaite pawh dan bawchhia bawka midang ruat hnan an nihna hi a ruattu ZPM sorkar hian kan hunbi tiam chhunga ngeia sut ve ve turin kan ngen. Kan beisei anga bawhzuina a awm loh chuan a tawp thlengin kan bawhzui dawn," an ti.

MNF Legal Board hian September 9, 2024 tlai dar 5 hma-a Lalchhandami MSCW chairperson atanga ban leh MSCW member ruatna notification sut an phut a ni.